وان طال السفر محمد عبد الماجد

محمد عبد الماجد وان طال السفر-امل كتبت وبدر قرا وحمد الشجره قال عايز قروشو
في موقع (سودنا فوق) نشر خبر من المتوقع ان يتصدر كل الصحف الرياضية اليوم.
الخبر ما بندس.
جرايد المريخ ذاتها بتجيبو.
الخبر كان برواية (سودانا فوق) على هذا النحو : (فتح لاعب المريخ المشطوب حمد الشجرة بلاغا جنائيا ضد نادى المريخ بسبب شيك مرتد قيمته مائة مليون عبارة عن حافز تسجيله للمريخ قبل اعوام قبل ان يتم شطبه خلال فترة التسجيلات الحالية وفى ذات السياق اثبتت ادارة المريخ انها قامت بدفع مبلغ 89 مليون جنية وتبقت له 11 مليون الا ان اللاعب عاد وقال ان هناك مبلغا وقدرة 50 مليون لم يستلمه وقد اثار هذا الموقف ردود افعال غاضبة فى المريخ وقال رئيس النادى السيد جمال الوالى انه كان يتمنى ان تحل ازمة اللاعب وديا).
اتاريهو حمد الشجرة ما ظهر بمستواه.
المسكين طالبهم (قروش).
ليه حق ما يلعب ليهم.
تعالوا شوف حمد الشجرة في (النسور) ح يظهر كيف؟.
ناس النسور ناس شرطة ..بسلموا قروشهم (كاش).
ما عندهم شيك (طاير).
ما معقول (النسور) تطير ..وشيكاتهم برضو (تطير)...الاتنين ما بجن.
عشان كدا ناس (النسور) شيكاتهم ما بتطير.
يا ناس المريخ فالحين لي تشتكوا في ولاد المنتخب .. صالح الامين في مهمة وطنية ..جبتوا ليهو (الشرطة).
صالح عملتوا فيه كدا..في نزار بتعملوا شنو؟.
نزار دا حسب (الغيظة) يمكن تجيبوا ليهو (الانتربول).
بل يمكن تجيبوا ليهو السرية التي نفذت الغارة على اسامة بن لادن ...سرية (عجول البحر) (Navy seal).
البتعملوا في صالح ..تلقوا في (حمد الشجرة).
انتوا ما تدوا الولد (قروشو)..تشطبوا ساكت.
قايلنوا حسب عقلهم ما بتكلم.
50 الف غالبكم تدفعوها لحمد الشجرة.
وارغو شال وارد (نفط) 6 شهور.
حمد الشجرة 50 الف ما عاوزين تدفعوها.
تطلعوا قروشه من زيادة البنزين القادمة.
ما في مشكلة.
نحن موافقين.
الحضري دفعتوا ليهو ..ودفعتوا للزمالك ..وللاهلي ..وما بعيد كمان تكونوا دفعتوا لي للاسماعيلي برضو.
حمد الشجرة عشان ما بجي في (قناة مصرية) ...ما عاوزين تدفعوا ليهو.
الدفع لو ما فيهو (فلاشات وصور) ما بتدفعوا.
إلا يصوركم عشان تدفعوا.
بالمناسبة دي موضوع حمد الشجرة ما الواقعة الاولى ..قبل كدا خميس مارتن ...كان طالب المريخ (قروش).
خميس مارتن كان عاوز من المريخ على ما اعتقد 10 الف جنيه ...يعني ما قروش.
مع ذلك المريخ او قل جمال الوالي فشل في منح خميس مارتن هذا المبلغ القليل.
يا قريش انت بدل (بياناتك) المسيخة دي ما تدفع لي حمد الشجرة قروشو.
هسه لو الموضوع فيه (بيان) ح تصدروا وتظهر يا قريش.
لكن الموضوع من يكون (دفع) ما بتنستروا.
همد (للتصريحات).
قريش ( للبيانات).
متوكل احمد علي (للصور).
ابوجريشة (للمدافرة).
تاني مجلسكم فيه منو؟.
هاشم الزبير ..(بسافر) عطبرة ...وبرجع ساكت.
اتذكرت زول.
عبدالله حسن عيسي (للنيل).
لنيل من النيل.
غايتوا يا ناس النيل عندكم مجلس بدوروه من (العرضة الجنوب).
مجلس شغال بي (التلفون).
ما علينا.
النيل دا تاني ما بتقوم ليهو قايمة.
بنزل الموسم القادم.
الان المريخ يفشل في سداد 50 مليون جنيه (50 الف جنيه فقط) لاللاعب حمد الشجرة الذي سجل في المريخ قبل موسمين.
يعني سنتين ما سددوا لحمد الشجرة (قروشه).
لو في كل يوم بتدوه عشرة جنيه ..كان قروشو انتهت هسه.
مع ذلك جماعتك بتفاصحوا وبتكلموا عن قدرة المريخ المالية.
والله انتوا طلعتوا أي كلام.
عشان كدا انا بعد واقعة خميس مارتن وحمد الشجرة ..صدقت عصام الحضري.
اكيد المريخ ما منحه حقوقه ..وإلا ما اتخذ عصام الحضري هذا الموقف المتشدد.
حقيقتكم اتكشفت ...ناس المريخ ديل ما عندهم قروش ...تامنها موية ساكت.
حمد الشجرة...عاوز منهم قروش...خميس مارتن عاوز منهم قروش ..الحضري عاوز منهم قروش.
قالوا ليك طارق مختار ذاتو عاوز منهم قروش.
طمبل ما معروف.
طمبل الي الان قافل تلفونو.
ما معروف خبرو.
طمبل لو عاوز يختم حياتو في الهلال ...كلموه يتسجل في (هلال كادوقلي).
خلوه يكفر شوية.
عمليتك دي يا طمبل ما بكفروه بالساهل.
تذكر وقت كنت بتلعب في الهلال.
الدنيا كلها بتتكلم عنك.
بتذكر.
وقت مشيت جنوب افريقيا.
اول لاعب سوداني يحترف في جنوب افريقيا.
تذكر.
هسه شطبوك بدون حتى ما يرجعوا ليك.
يا حليلك يا طمبل.
يا حليلك ..وحليل ايامك.
ملحوظة : طمبل شطب وحمد قال عاوز قروشو.

هوامــــــش

المريخ لو مشي (خطوة) لي قدام ح يلاقي (مازمبي).
اخير تطلعوا ساكت.
محمد كمال سمع بالقرعة دي ..قال ليهم اشطوبني هسع ناو.
قال ما بقعد.
قال ما بيلعب.
محمد كمال عاقل ..اخير ليه يتخارج.
محمد كمال دا قدام اهلي شندي ..مشي كسر اصبعو.
قدام مازمبي يعمل شنو؟.
دي حالة اخير منها (الشطب).
يا طمبل انت محظوظ.
انت الله بريدك ساكت كدا.
ما زمبي شنو البقابلوا بي ناس نجم الدين.
شفت نجم الدين في سيكافا ...افتكرتو متحصل (ضرائب).
الزول دا مالوا بتلفت كدا.
أي مهاجم قابلو قطعو (وصل).
المعز محجوب نال جائزة افضل حارس في سيكافا..وقد كان المعز فعلا في القمة.
المعز محجوب اصلو وقت يقعد ليهو احتياطي بهاءالدين بيلعب كدا.
اهم شيء وزن المعز نزل.
بهاءالدين لو قلل وزنو سوف يصبح الحارس التاني في السودان.
ويمكن بكل بساطة ينافس المعز محجوب.
الهلال مفروض يعجل بتسجيل بهاء الدين.
لو شطب الهلال عبده جابر ..او اعاره ...سوف نعتبر تسجيلات الهلال فاشلة.
عبده جابر مستقبل الهلال.
اياكم والتفريط فيه.
مازدا فرحان.
فرحان عشان اصبح ثالث سيكافا.
لو دا طموحك يا ود الناس ماشي تلعب في بطولة الامم الافريقية كيف؟.
هناك ما في الصومال ...ولا روندا.
هناك في ساحل العاج.
ناس امير كمال ديل ما بياكلوا عيش في بطولة الامم الافريقية.
السمع السر بخيت في الاذاعة الطبية وقناة قوون سوف يعرف المستوى الحقيقي لامير كمال.
السر بخيت سكرتير نادي الموردة السابق اكتر زول عارف امير كمال.
السر بخيت قال بسبب امير كمال الموردة اتغلب في 7 مباريات متتالية في الممتاز.
واوشكت الموردة من الهبوط.
امير كمال (ثغرة) واضحة.
تاني عرفنا كيف تغلب المريخ.
امير كمال كدا ...مجدي ام بدة كيف؟.
مجدي ام بدة ناس المريخ حالوا يصغروه شوية ..قاموا سموه مجدي (تحدي).
تحدي.
شارع مدنى.
ما بهمنا.
في وجود مجدي ام بدة ..اوعكم تفكروا تشطبوا (العجب).
كلمناكم نحن.
الكلام دا قلناه مية مرة.
الهلالاب الايامات دي كلهم في (الحدايق).
اخر انبساطة.
قالوا عايشين (عيد الحب).
بقي عندنا فلانتاينين.
خليفة (فلانتاين).
وفلانتاين..فلانتاين.
الله يديم (الحب).
نحن ما عندنا حاجة ساكت.
نحن أي حاجة عندنا بي نظام.
التسجيلات تبقي لها 8 ايام.
والهلال الي الان لم يحسم ملف المحترفين.
سادومبا مطلوب من اكثر من نادي ..واكيد لن يجد الهلال بديلا له في هذه الفترة القصيرة.
لذلك يجب الاحتفاظ به.
فلانتاين نتمنى ان يحسم امره سريعا.
وقت ما في.
ونحن وغيرنا في انتظار مفاجأة الامين البرير.
اذا جاء محترف اخر للهلال غير فلانتاين ..فان الهلال في الموسم القادم سترى الفرق التي تواجهه (الجحيم).
نزار وفلانتاين والطاهر حماد ..ومحترف اخر ..عاوزين شنو اكتر من كدا.
المريخ هذا الموسم تخلص من اصحاب القامة الطويلة.
حمد الشجرة ومقدم ..وجاء بي فيصل وامير.
وسطكم دا تاني الواحد الا يشب عشان يشوفو.
انتوا ما شفتوا مهند ونزار في وسط المنتخب كيف.
مهند الطاهر من نجوم بطولة سيكافا.
ما قدمه مهند الطاهر في هذه البطولة يكفل له الظهور اليوم في كأس العالم للاندية.
بالجد.
الله شاف الهلال من كرنقو وامير كمال.
من سوف يكون الضحية القادمة في المريخ بعد محمد كمال.
راجي ام سعيد السعودي.
لو شطبتوا سعيد السعودي بتكونوا عملتوا خدمة كبيرة لاهلي شندي.
سعيد ما كعب في الاهلي.
في الاهلي نجاحه اكبر.
الليلة شوفوا الطاهر حماد بعمل شنو؟.
الليلة كورة الطاهر.
عاوزين مازدا يشوف البحصل.
مازدا طالب بضم كلتشي للمنتخب.
يا راجل.
نحن ناقصين.
كفاية كرنقو.
عاجل : العجب قفل تلفونو


(( هدف فلنين في اهلال )
)

[img]cam to gif[/img]